Arrestohen 5 rrëmbyes! Prenga vdiq nga dhuna rrugës për në resortin 'Golden'! Konflikti për 283 kg kokainë në Angli

Në vijim të operacionit për pengmarrjen në Kamëz, një tjetër person me inicialet F.Xh. është arrestuar nga policia mbrëmjen e sotme. Në Kavajë është arrestuar një anëtar i familjes Hajri që akuzohet për pengim të zbulimit të se vërtetës. Gjithashtu janë edhe disa të tjerë të shoqëruar po nga Kavaja dhe kushërinj të Hajrajve. Aksioni po zhvillohet nga Operacionalja e Tiranës në lagjen nr. 5 në Kavajë.

Jan Prenga dhe resorti "Golden" në Shijak

Hetues anglezë janë duke bashkëpunuar me policinë shqiptare për zbardhjen e pengmarrjes së Jan Prengës, babait të 5 fëmijëve në Kamëz. Kjo për arsyen se njëri nga vëllezërit Prenga, ka qenë në përgjim në Angli, i i dyshuar për transportues droge, korrier i bandës së trafikut drejtuar nga vëllezërit Hajri. Burime nga organi i akuzës thanë për gazetarin e Shqiptarja.com, Elton Qyno, se grupi kriminal me qendër në Shijak, ka dashur të fusë në territorin anglez 283 kg kokainë.

Në një episod të mëparshëm ky grup ka arritur të fusë me sukses në Angli, 60 kg kokainë. Droga është futur nga një port i Anglisë, dhe nxjerrësi i drogës ka qënë njëri nga 3 vëllezërit Prenga që banon në Angli. Ky episod është monitoruar nga agjentët e antidrogës në Britani.

Në dhjetor të 2019, grupi ka përdorur sërish një nga vëllezërit Prenga, për të nxjerrë nga porti 283 kg kokainë dhe futur në territorin anglez. Sasia e drogës ka dalë nga porti, por nuk është çuar në destinancion nga vëllai i Jan Prengës. Si pasojë e mungesës së drogës, grupi në Shqipëri, vëllezërit nga Shijaku, Leonard dhe Altin Hajri, njëri i arrestuar tjetri në kërkim, kanë marë peng Jan Prengën në Kamëz, vëllain e personit që nuk dorëzoi në destinancion 283 kg kokainë.

Marrja peng e Jan Prengës në Kamëz, është kryer duke përdorur sende të forta dhe armë. Sipas policisë e prokurorisë, autorët kanë përdorur makinën e një këngëtareje, automjet i cili rezulton të jetë vjedhur prej tyre. Deri më tani policia refuzon të jepë emrin e këngëtares që i është vjedhur makina.

Pengmarja ka ndodhur për të detyruar vëllain tjetër Prenga në Angli të tregonte se ku e kishte çuar drogën, e nxjerë nga porti. Bisedat mes personave në Shqipëri dhe Angli janë përgjuar nga autoritet angleze. Policia angleze ka dhënë informacion dhe ka bashkëpunuar me policinë shqiptare. Nga përgjimet vëllai i Jan Prengës në Angli, shprehet disa herë “ku ma keni çuar vëllanë, ku ma keni çuar vëllanë”.

Nga kamerat filmike, është provuar se Jan Prenga ka hyrë i gjallë në resortin "Golden" në Shijak, pasi është rrëmbyer me forcë në Kamzë. Ka shumë dyshime se Jan Prenga ka ndëruar jetë si paosjë e plagëve dhe goditjeve të shumta që ka marrë nga rrëmbyesit. Jan Prenga është nxjerë i vdekur nga ambjentet e resortit Garden, siç shfaqet në disa episode të kamerave të sigurisë pranë resorit, por trupi i tij ende nuk është gjetur.

Mark Sula, kunati i Jan Prengës, 49-vjeçarit që vdiq pas rrëmbimit të ndodhur 11 ditë më parë në Kamzë mes dhimbjes është shprehur për Report Tv se kërkon nga policia që të gjendet trupi i të afërmit të tij

"Na thanë mbrëmë nga policia që ka vdekur po s’kemi kufomën. Kërkojmë nga policia të na e gjejë sa më parë. Jemi të tronditur nga dhimbja', është shprehur ai jashtë kamerave.

Një ditë pas arrestimit të të dyshuarve për pengmarrjen dhe më tej vrasjen e Jan Prengës të marrë peng 11 ditë më parë në Kamëz, Policia me forcat speciale RENEA është ende e pranishme në kompleksin "Golden" në Xhafzotaj të Shijakut. Operacioni vijon për identifikimin e bashkëpunëtorëve të tjerë në këtë krim të rëndë, por më e rëndësishmja, në hetimet që mund të zbulonin vendin ku mund të jetë fshehur trupi i pajetë i 49-vjeçarit Jan Prenga. Nisur nga fakti që RENEA ndodhet pranë kompleksit, ka dyshime të forta se trupi i Prengës të jetë groposur diku pranë resortit. Kamerat e sigurisë, elementi kryesor që çoi në identifikimin e rrëmbyesve, fiksuan momentin teksa Jan Prenga nxirrej nga një makinë dhe u fut nga autorët në ambientet e kompleksit "Golden". Puna në resort është bllokuar, dhe policia e prokuroria vijojnë punën hetimore. Por kërkimet për trupin e Jan Prengës vijojnë edhe në rrethina pranë kësaj zone. Deri më tani të arrestuarit nuk kanë pranuar akuzat e ngritura ndaj tyre.

Hetimet për rrëmbimin e Jan Prengës do të përfshijnë edhe SPAK-un për hetimin pasuror të të arrestuarve të cilët dyshohen bashkëpunëtorë në ngjarjen. Në lidhje me këtë ngjarje janë arrestuar 4 persona Leonard Hajri 36 vjeç, babai i tij Bajram Hajri 64 vjeç, kushëriri Elton Hajri 32 vjeç dhe shoku i tyre Olsi Turja ndërkohë në kërkim vijon të jetë Altin Hajri, pronari i resortit ku do të mbahej peng Jan Prenga si dhe katër persona të tjerë.

Vëllai i Jan Prengës, Ndrek Prenga ishte arrestuar në Angli në gusht të vitit 2017 dhe u denua me 8 vite e gjysmë burg. Ndrek Prenga u dënua për trafik të drogës së cilësisë së lartë. Nuk dihet nëse ky rast ka të bëjë edhe me ngjarjen e rëndë ku vëllezërit Hajri nga Shijaku rrëmbyen Jan Prengën 11 ditë më parë, i cili më parë mbeti i vdekur pas goditjeve të marrë dhe humbjes së gjakut.

Vendi ku u rrëmbye Jan Prenga

Report Tv siguron foton Jan Prengës, 49-vjeçarit që mbeti i vrarë pas rrëmbimit të ndodhur në Kamzë 10 ditë më parë.

Jan Prenga ishte babai i 5 fëmijëve dhe sipas policisë u mor peng pas një konflikti droge mes një prej vëllezërve të tij dhe vëllezërve Hajri për t'u mbajtur peng në resortin luksoz Golden në Shijak.

Operacioni "Resorti", për kapjen e autorëve të pengmarrjes së 49-vjeçarit, në Kamzë.

Operacioni nga forcat Speciale Renea, në bashkëpunim me Drejtorinë Vendore të Policisë Tiranë e Durrës, në koordinim nga Departamenti i Policisë Kriminale në Policinë e Shtetit dhe nën drejtimin e Prokurorisë së Rrethit Gjyqësor Tiranë.

Sekuestrohen armë zjarri, municion luftarak, aparate celular, automjete dhe një shumë eurosh.

Në vijim të punës nga grupi i posaçëm hetimor i ngritur për zbardhjen e ngjarjes së ndodhur më datë 17.01.2020, në rrugën “London”, Kamzë, ku disa persona rrëmbyen 49-vjecarin J. P., pas një hetimi të thelluar, në bashkëpunim me prokurorinë, duke përdorur metodat proaktive, u bë e mundur zbardhja e kësaj ngjarjeje.

Në bazë të provave të grumbulluara nga grupi i posaçëm hetimor, Gjykata e Rrethit Gjyqësor Tiranë nxori urdhër për të ushtruar kontroll në disa subjekte private, hotele dhe tri banesa private në fshatin Pjezë, Shijak, Durrës, si dhe urdhra ndalimi për disa shtetas.

Në këtë kuadër u zhvillua operacioni policor "Resorti", si rezultat i të cilit u bë e mundur kapja dhe ndalimi i shtetasve:
L. H., 35 vjeç, banues në Shijak, i dënuar më parë;
O. T., 36 vjeç, banues në Shijak;
E. H., 32 vjeç, banues në Shijak; 
B. H., 64 vjeç, banues në Shijak;

Gjithashtu, po në kuadër të operacionit, gjatë kontrolleve të kryera në disa subjekte private, hotele dhe tri banesa private në fshatin Pjezë, Shijak, Durrës, u gjetën dhe u sekuestruan 2 armë zjarri pistoleta, një sasi municioni, 16 aparate celular, 4 automjete dhe një shumë eurosh.

Nga veprimet e thelluara hetimore ka rezultuar se personat, pas rrëmbimit të shtetasit J. P., kanë shkuar direkt në resortin në pronësi të shtetasit A. H. 

Po nga veprimet hetimore rezulton se personi i rrëmbyer, si pasojë e goditjeve të marra në Kamzë dhe humbjes së gjakut, ka vdekur vdekjen gjatë rrugës për ta transportuar për në resort,  aty ku do mbahej peng. 

Gjithashtu, rezulton se personat janë kujdesur për ta fshehur trupin e shtetasit J. P., ndërkohë që forcat policore vijojnë kërkimet në zonën e Shijakut, për gjetjen e trupit.

Ky rrëmbim ka ardhur si pasojë e një konflikti që një nga vëllezërit e viktimës ka pasur me organizatoret dhe rrëmbyesit, si pasojë e disa konflikteve kriminale në Britaninë e Madhe.

Në bashkëpunim me prokurorinë vazhdon puna për identifikimin dhe kapjen edhe të personave të tjerë të përfshirë në organizmin dhe rrëmbimin e këtij personi, me pasojë vdekjen.

Për shkak të hetimit, nuk bëhen të ditura detaje të tjera dhe kërkojmë nga media që të mos publikojë informacione të pakonfirmuara, pasi cenojnë rëndë vijimin e hetimeve të kësaj ngjarjeje.
 
Materialet do t’i kalohen për ndjekje të mëtejshme Prokurorisë pranë Gjykatës së Shkallës Parë Tirane, për veprat penale “Rrëmbimi ose mbajtja peng e personit”, “Fshehja ose asgjësimi i kufomës”, “Moskallëzimi i krimit”, “Veprime që pengojnë zbardhjen e të vërtetës”, të kryera në bashkëpunim dhe “Armëmbajtja pa leje.